得救見證

黃靜欣

我自小已經開始接觸基督教，因為我在一間基督教的小學讀書，每天都有一個短短的早會祈禱，每星期都有一至兩堂聖經堂，所以自小我背主禱文已經背得好熟，而從聖經堂中亦知道好多關於耶穌的事蹟，我還記得其中有一課講到耶穌教導門徒要原諒人七十個七次，那時我立即去計，但小學的程度當然唔可以咁快計到答案，但我諗我一定做唔到咁多次，於是那一刻我就知道耶穌真係一個好好的人，雖然那時我每晚訓覺前都會祈禱，但那時的我根本未知道救恩是甚麼，只是相信有個創造天地的神而祈禱。

那時的我是非常自私的，會跟男同學打架，但會在老師面前扮乖學生，回想那時的自己都幾邪惡∼我在任何的情況都只會想自己的利益，甚至對妹妹都會這樣。中一那年，我表姐突然間失蹤，當時我們都非常擔心，我媽媽第二天早上看報紙後，有一種直覺認為我表姐已經遇害，我開始有一種害怕\要失去親人的感受，於是我向神祈禱，我跟神說：「天父呀∼雖然我跟我表姐經常鬧交，甚至打架，但天父呀，求你叫佢可以平安返家，我以後都唔會再跟佢打架，甚至我會一生一世相信你，聽你的說話。」但認屍後證實那遇害者就是我表姐，那時我又傷心又憤怒，我質問神說：「我已經向你祈禱，為什麼你不救我表姐呢？我由呢一刻開始唔會再相信你，以後我只會跟媽咪拜神，唔會再信你！」

由那一刻開始，我冇再祈禱，亦開始跟媽咪去拜神，學校佈道會的時間我會不恥地笑，或者會發白日夢，因為我唔再相信上帝，身邊亦有唔少的同學向我傳福音，但我永遠唔會等佢ｏ地講完，我已經拒絕再聽，但那幾年的生活我過得好辛苦，因為我表姐的事，我完全唔能夠相信身邊的人(因為我表姐是遭朋友殺害)，有時候我甚至未能夠完全相信親人，自己經常都處於一個情緒極度低落的狀態，但已經唔懂得去喊(因為已經冇事比失去親人嚴重，冇咩值得我去喊)，亦盡量在人前裝作堅強(因為我認為咁先可以保護自己)對人亦唔會投放任何感情，經常都會諗去自殘身體去博取其他人的關心，我甚至諗過生命活得咁唔開心，咁冇意義，想要自殺，但自己怕痛，最後當然都冇，但我認為生命最重要的就是金錢和權力，有錢和權力後，身邊其他事例如朋友和安全感等自然會隨之而來。

但神從來冇因為咁而離棄我，到中四中五，我面對會考有好大的壓力，我中一至中三時一直成績優異，我從來冇擔心我的前途，但到中四中五，我發覺原來有好多人比我更叻，我甚至擔心自己不能升讀中六，呢個時候，我身邊好多好多基督徒的朋友都安慰我，當中可盼更用佢生命好多的見證去跟我分享，當時我都會懷疑佢會唔會講大話，但呢個神係咪真係咁好呢？佢有冇必要要因為一個完全唔存在的神去跟我講大話呢？！但最後我都不了了之，直至中六，歐欣邀請我返沙崙，途中我堅決表明我唔會決志，亦唔會再跟她返教會，但好奇妙地，上帝的靈感動了我，當時我知道原來耶穌降世，係為我ｏ地而死，一個咁好ｏ既人竟然可以好到無條件地為我ｏ地而死，只要我ｏ地相信神，我ｏ地的罪就可得赦免，死後仲可以有永生。雖然呢ｏ的我在學校都聽過好多次，但就係咁奇妙，上帝在我身在作工，只要我相信佢，就可以將我生命的所有重擔都交俾佢，佢會同我一齊去行，那時我喊得好激動，自我表姐死後，我第一次因為感動而喊，開始呼召時，我好想舉手決志信主，但我控制我自己，因為我還記得我答應過我的媽咪，但到最後一次時，我最終都忍不住要舉手決志信主。

信主之後並唔係一帆風順，我要面對好多的問題，但我已經唔覺得自己背負住好多重擔，因為我知道無論如何，神都會跟我同行，我亦開始打開自己的心跟其他人建立友誼，我的生命比之前開心好多，慢慢我更學懂得點去愛身邊的人同為佢ｏ地付出，我亦因為咁我明白「施比受更為有福」，因為我發覺當自己為身邊的人付出，佢ｏ地開心時，自己比佢ｏ地會更加開心！！我明白呢ｏ的都係金錢同權力換唔到的，雖然呢一刻我仲有好多的缺點，但我會繼續努力去改變，因為我知道神都會改變我，無論呢一刻我幾唔好，神都唔會離我而去，所以大家見到現在的我是比以前開心好多的，因為我有上帝與我同行。如果你是未信的朋友，我鼓勵你ｏ地去認識呢一位神，你會經歷到上帝與你同行的喜樂！

得救見證主頁